Sunday, 20 September 2015

Mein Myaun !! Part 1

Raat ke 2 baje the aur mein apne ghar ki taraf kooch kar rahi thi, tabhi mera pair phisla aur mein us teemanjale makaan se neeche ja giri. Aisa laga jaise sab kuch ghoom raha ho.. Us kaali andheri sardi ki raat mein sab kuch aur kala darshayi de raha tha.Kaano mein bas sannate ki awaz ja rahi thi. Mein apne ghar se shayad 10 kadam hi door thi, par na chal pane ki himmat thi, na un teeno ko awaaz lagane ki…

Meri ankhein dheere dheere band ho rahi thin aur kuch hi palon mein sab kuch bilkul shant ho gaya..as paas kuch nahi bas shanti hi shanti !!..Aisa ehsaas jise shabdon mein vykat kar pana bahut hi kathin hai. Phir achanak se mein uthi, apne shareer par lagi dhool jhaadi aur ek lambi angdaayi lete hue mene apni ghar ke taraf dekha jo suraj ki lalima mein naha raha tha.

Isse pehle ki mein ghar ke andar jati, samne se wo teeno bhagte hue aye. Unhe dekh kar meri khushi ka thikana hi nahi raha..”Antatah mein un teeno ke pass pahunch hi gayi thi.. Par yeh kya ? Unhone to mujhe andekha hi kar diya ? Mein teen din ghar kya na ayi mujhe bhool hi gaye ?"

Dil toot sa gaya, ankhein bhar ayin, seene mein bharipan sa lagne laga jaise kisi ne chura bhonk dia ho. Mene peeche mudkar dekha to wo teeno usi teemanjale makaan ke neeche baithe hue the..Mujhe kuch samajh nahi a raha tha... Mein dheere dheere unki taraf badhi aur chup chap un teeno ke peeche jakar baith gayi.

Un teeno ki pathrayi si aakhnein ek tuk neeche taak rahi thin jinmein se ansoon barish ki tarah tap tap gir rahe the..Mene apnae pair se un teeno ke hathon ko sahlaya par mujh par to koi dhyan hi nahi de raha tha. Mein jhunjhlate hue un teeno ke samne ki taraf ayi to dekha ek kali safed  bejan billi padi thi, mujhe kuch samajh nahi a raha tha…mein dabe hue kadmon se uski taraf badhi aur use choone ki koshish kari tabhi veh teeno phooot phoot kar ro pade aur bas ek ke hi baat dohraye ja rahe the“ Maun wapis Aja Maun”..Mein yeh sunkar halka sa muskurayi aur un teeno ki taraf pyaar se dekhte hue ek lambi "Myaaaaon" mein kaha “ arey tum ro kyun rahe ho???” “Mein to idhar hu..samne dekho to zara!!..Mein yahan hun !!!!…Mein Myaaaun!”



2 comments: